Tanhayi...

sagar jab shant ho, wo hamesha udaas nahi hota
kabhi kabhi acha lagta hai, jab koi paas nahi hota

Mehfooz....

paani ki ek boond ki tarah kisi sagar mein kho jana nahi chahti
mujhe ek phool ki tarah baki phoolon ke sath kyari ko mehkana hai
lal rang ki tarah akaash ke neele rang mein milna nahi chahti
mujhe ek sitare ki tarah baki taron ke sath akaash ko sajana hai

kitne hi dost, kuch door kuch paas hain
kitne hi rishte, jo bahut khas hain
par ek jo rishta apne aap se hai use bhi khas banana hai
gam baante hain, khushiyan bhi baati hain,
doston ke sath poore din aur kitni hi raatein kaati hai
par jo waqt khudke sath bitaaya, wo bhi ek anmol khazana hai

jindagi mein dosti aur pyar ki dhup sunahri ho
par fir bhi ek choti si duniya jo sirf aur sirf meri ho
ek bahut khubsoorat ehsaas apni us choti si duniya mein kabhi kabhi kho jana hai

jab kisi rishte mein beech raah mein atak jaun
ya duniya ki bheed mein kahin bhatak jaaun
to apni wahi choti si duniya mera sabse mehfooz thikana hai

Old is Gold

aise hi bethe bethe dimag mein ek khayal aya,
aur is baar humne kafila chidiya-ghar ki taraf badhaya,

bas pahunch gaye, par wahan dekhkar ticket ki lambi katar,

laga kahin yahin na baj jayein char,

par waqt par hi tickets mil gaye,

aur sabke thake hue chehre fir se khil gaye,

to ab hua hamari chidiya-ghar ki yatra ka agaaz,

aur ghuste hi dikhe khuda ke na jane kitne i'jaaz,(miracle)

duniya bhar ke hiran, giraaf, bandar, sher

chote bade rang birange panchiyon ke dher,

chalte chalte raaste mein achanak gaya dhyan,

wahan tha paani ke kinare ek khubsoorat sa budha machan,

likha tha 'upar chadhna mana hai',

par aaj tak kabhi kisi ka kaha suna hai...

bas uske khambon ki daraaron ko andekha kar chad gaye upar,

raaste se jane walon ne bacchon ko kaha wo dekho beta hum jaise char aur janwar,

par shayad use hamara sar chadna pasand nahi aya,

to usne apne kamjor khambon ko jara sa hilaya,

humne socha isse pehle ki ye yahin dum tod de,

behtar hai hum ise akela chod de,

utare, aage badhe kuch thake thode bhuke,

dheere dheere thoda chale thoda ruke,

fir jo mila thoda bahut khaya,

aur apne alsaaye josh ko jagaya,

ab purane kile ki baari thi,

aur sabki palkein bhi kuch bhari thi,

socha chalo khandaron mein chalkar thoda sustayein,

aur kahin bethkar thoda araam farmayein,

par andar ghuste hi ek alag hi mausam tha,

gazab ka khubsoorat aur angrezi mein kahein to 'awesome' tha,

charon taraf ghaas ke hare kaaleen, phulon se bhare baag, lambe khajoor,

jannat ke is nazare ko dekhkar neend ne choda saath aur chada ek naya suroor,

ab to sone ka koi iraada na tha,

aur hamare paas waqt bhi jyada na tha,

waise to wo pandawon ka kila tha,par jaise wahan mughalon ka kabza tha,

itne saare anarkali aur shah-jahan ek sath dekhne ka aur hi maza tha,

in khandaron ko dekhkar laga, kon kehta hai budhapa haseen nahi hota,

waqt ki maar khayi aisi barkarar khubsooorti dekhkar armano ko rokna mumkin nahi hota,

tabhi thodi door kuch chote dikhe jinki chat par chadna bhi asaan tha,

aur bas upar pahunchte hi jaise haathon mein sara aasman tha,

tabhi chaukidar ne awaz lagayi aur waqt yaad dilaya,

jab ek baar mein nahi suna to chillakar neeche bulaya,

humne thodi aur mohalat mangi to usne ghadi dikha di,

bas fir un imaaraton se dobara milne ka wada kar humne wida li,

ab to na aankhon mein door tak neend thi na koi thakawat thi,

laut-te hue dimag mein bas angrezi ki wo kahawat thi,

"Old is Gold"

Mera Basant

Jab dil mein itna kuch ho aur hath sath na de...
itni khushi ek sath to koi bhi kaynaat na de...

jab tanha akele ho tab tanhayi se dar lagta hai
jab dost aise mil jayein to unse judai ka dar lagta hai

dimag ke khayalon ko kagaz par utarne ke liye shabdkosh mein shabd na mile
aise phool to meri kyari mein pehle kabhi nahi khile

is baar basant jaise mere liye hi aya hai
aur apne saath mere liye itna kuch laya hai

kuch dost aise hote hain, jo tez dhup mein saya banke aate hain
fir jindagi mein saya bankar reh jaate hain

par doston aur waqt mein shayad koi dushmani si hai
unka saath ho to waqt ki narazagi lazmi si hai

mujhe maloom hai, kuch waqt baad sab kuch badal jayega
par kam se kam is basant ka ehsaas aane wale patjhad ko bitane mein to kaam ayega

kyun na inke saath bitaye har ek pal ko sanjokar rakh lun
aur aane wale waqt ka hisab in 3-4 mahino mein hi pura kar lun

(mera ihsaas bayan kare aise koi tasveer nahi mili...is aashuftaah ke liye maafi chahti hun)

Mausam Hai Ashiqana

Humne to dubkar wafa ki, par aap to bewafa sanam nikle

Aapne to humein kiya nahi yaad, aapko paane ke liye hum to karne har jatan nikle

Hum dube the tanhayi ke andhere mein, aur aap logon ke saath manane jashan nikle

Humne aapse dil se mohabbat ki, aur aap hum par karne sitam nikle

Aapne humein kabhi nahi chaha, par hum chahte hain ki aapke sath hi hamara har janam nikle

Ab to aa jaao isse pehle ki hamara dum nikle...

...Dekha Hai

saahil par ghumte hue, suraj ko dhalte dekha hai
aasman ke laal rang ko sagar ke nile rang mein milte dekha hai

ek chote se ghonsle mein kuch nanhi jaano ko bade pankhon mein simte dekha hai
us gore mukhde par gulabi chunar ko lipte dekha hai

thandi hawa ko unche chinaron se kanafusi karte dekha hai
gulzar mein phulon ko ek doosre se dillagi karte dekha hai

shama ke pyar mein parwane ko jalte dekha hai
log dubta hua suraj dekhte hain , humne to chand ko dhalte dekha hai

Raat

bhor ke bad din to hua par kya mujhe hi aisa laga ki is bar fir raat jaldi aa gayi,
jis roshni ka intezar tha pata hi nahi chala kab aakar kab wo andhere mein fir sama gayi

is bar kuch jada hi lambi thi, andhera bhi gehra tha jismein kho gayi,
thaki hui thi pata hi nahi chala kab rote rote so gayi

ab bhi raat hai ya wo lamba din nikal gaya hai,
ab bhi patjhad hai ya mausam badal gaya hai

meine abhi aankhein nahi kholi hain ya shayad mein kholna nahi chahti,
khwaabon sapno ke bare mein kuch bhi sochna ya bolna nahi chahti

khwaab khubsurat to hote hain, par jada lambi raat nahi,
aah..sapno ke baare mein ab koi baat nahi

ab bas jald hi aankh kholte hi wo roshni sunhari chahti hun,
aur agar usmein der hai to tab tak ke liye neend bahut gehri chahti hun